Alichokisema Kiiza kitawakuta Yanga kweli?

MSHAMBULIAJI mpya wa Simba, Hamis Kiiza, raia wa Uganda, amesema licha ya Yanga kumtolea mbavuni msimu uliopita katika mazingira ya kutatanisha, yeye hana ugomvi nao, lakini akaonya.

Kiiza amesema anaamini Yanga walifanya hivyo kwa maamuzi yao na siyo kwa ubaya na yeye aliridhika, lakini sasa ametua Simba na akili yake ipo huko kuhakikisha wanafanikiwa na kwamba sasa wajiandae tu wakikitana uwanjani.

Akizungumza na Mwanaspoti Kiiza alisema: “Licha ya Yanga kunifanyia vile, mimi sina ugomvi nao. Walifanya hivyo kwa mapenzi yao, sidhani kama ilikuwa kwa ubaya na ndiyo maana nasema, amani tu. Ila tutakutana nao uwanjani.

“Lakini kwa sasa nipo Simba ndiyo timu yangu nasahau yote kuhakikisha nacheza kwa nguvu zote ili kuipa mataji mengi. Ninachoamini Simba ikifanikiwa na mimi nitafanikiwa kwa sababu nafasi ya kuonekana zaidi ni kubwa.”

Kiiza aliachwa na Yanga kwenye mazingira ya kutatanisha chini ya Kocha Mbrazili, Marcio Maximo, akaenda Misri kucheza. Lakini sasa amejiunga na Simba ambayo amewaahidi mashabiki wake lazima ataifanyia mambo makubwa.