Simba kusajili mwingine tena.. Soma hapa

BAADA ya Kocha wa Makipa wa Simba, Salum Abdul, kusisitiza anataka kipa mpya mzoefu katika kikosi hicho, uongozi umepanga kulitekeleza agizo hilo kwa kutumia michuano ya Kombe la Kagame kusaka kipa huyo.

Simba ilikuwa na makipa wanne ambao ni Ivo Mapunda, Hussein Sharrif ‘Casillas’ na vijana Manyika Peter Jr na Denis Richard, hata hivyo Casillas amejiondoa katika kikosi hicho akirudi zake Mtibwa Sugar na kufanya Mapunda asiwe na mpinzani.

Kutokana na hali hiyo, inadaiwa kuwa Simba inahitaji kipa mpya kumsaidia Mapunda ambaye licha ya kuwa tegemeo lao, lakini pia amekuwa akiandamwa na hali ya kuwa majeruhi hivyo kulazimu kutafutwa mbadala. Pia inaelezwa mchakato wa kumpata Juma Kaseja unaendelea kimya kimya.

Akizungumzia usajili wa wachezaji wa ndani, kiongozi huyo alisema kuwa kulikuwa na mpango wa kumsajili Danny Lyanga lakini zoezi hilo linakuwa gumu kwani anahitaji Sh40 milioni ambazo Simba inaziona ni nyingi mno kwa hadhi ya Lyanga.

Mavugo

Katika hatua nyingine straika mpya wa Simba, Laudit Mavugo ameshindwa kujiunga na wenzake kwa wakati baada ya timu yake Vital’O kuingia fainali ya Kombe la FA la Burundi.

Vital’O ilicheza na Interstars na kushinda 2-1, mabao yake yakifungwa na Mavugo. Fainali itachezwa Jumamosi.