Sekunde 180 zilivyoiponza Yanga

WATU kimya na wala hakuna shabiki wa Yanga aliyekuwa na hamu ya kusimulia au hata kukumbuka matukio yaliyotokea uwanjani katika mchezo wao wa juzi Jumapili dhidi ya Simba ambao timu yao ilifungwa mabao 2-0.

Huo ulikuwa mchezo wa kirafiki wa Nani Mtani Jembe ambao kabla ya kuanza mashabiki wa Yanga walikuwa na uhakika wa timu yao kuibuka na ushindi huku Simba wakionekana kuwa tayari kwa lolote lile.

Kama utani Simba ilicheza kwa kutulia zaidi ikijipanga kwa mashambulizi ya hesabu huku Yanga wakiendelea na kawaida yao ya kucheza na jukwaa, lakini mambo yaliwaharibikia na kujikuta wakiruhusu mabao mawili kabla hata ya dakika 45 za kwanza kuisha.

Tofauti na Simba ambayo ilifanikiwa kurudisha mabao matatu Oktoba 20, mwaka jana baada ya kuwa nyuma kwa mabao 3-0 hadi timu zinakwenda mapumziko katika mchezo huo wa Ligi Kuu Bara ambao uliisha kwa sare ya mabao 3-3.

Mambo yalikwenda vizuri hadi wakati wachezaji wanatoka katika vyumba vya kubadilishia nguo na kujiandaa kurudi uwanjani kuanza kipindi cha pili. Hata hivyo kuna vitu vichache vilivyotokea katika nukta chache za kutoka chumba hicho hadi mlango wa kuingia uwanjani kwa muda wa dakika tatu hivi ambazo ni sekunde 180;

Mzozo chumbani

Hata kama Kocha wa Yanga Marcio Maximo alitoa maelekezo kwa wachezaji wake, hali ilionekana ni ya kulaumiana miongoni mwa wachezaji wa Yanga kwani hawakuwa na kauli moja na kwa dakika mbili walikuwa wakitulizana na kuombana kuacha kulaumiania.

Muda huo ulifaa kwa kila mchezaji kutafakari na kutulia kutazama watatumiaje maelekezo ya kocha kusawazisha makosa yao. Kiungo wa Yanga, Haruna Niyonzima alitumia muda mwingi kumtuliza nahodha wake Nadir Haroub ‘Cannavaro’ asiwe na presha na mchezo huo.

Watoto wa kocha

Wachezaji wengi wa Yanga walionekana kulaumu waziwazi kitendo cha Maximo kuwang’ang’ania wachezaji raia wa Brazil, Emerson Roque na Andrey Coutinho kwani wenzao walidhani wachezaji hao ambao wamebatizwa jina la ‘Watoto wa Kocha’ hawakuweza kuendana na kasi ya mchezo huo.

Hapa wachezaji walionekana kumlaumu zaidi Maximo kwa kuendelea kumuacha Emerson uwanjani. Akili zao hazikuweza kutulia na nafsi zao zilishikilia kuwa kocha wao Maximo hakuwa akitendea haki kikosi chake.