Usajili wa Simba watikisa

Juku Musheed

SIMBA imesajili kikosi ambacho ni tofauti kabisa na kile cha mechi saba za Ligi Kuu Bara ilizocheza na tayari imetangaza kuwa ni muda wa maumivu kwa timu pinzani.

Dirisha dogo la usajili linakamilika rasmi leo Desemba 15 saa sita usiku. Simba imewasajili wachezaji wawili wapya kutoka Uganda na kuvunja mikataba ya wachezaji wawili wa Burundi.

Ni kama usajili huo umechagizwa na mechi ya juzi Jumamosi ya Nani Mtani Jembe dhidi ya Yanga ambapo Simba ilipata ushindi wa mabao 2-0.

Kamati ya Usajili ya Simba, baada ya kikao cha muda mfupi ilikubaliana na benchi la ufundi kuwasajili beki wa kati Juku Musheed kutoka Victoria Univercity FC na Simon Sserunkuma wa Express. Timu zote za Uganda.

Musheed anamudu kucheza beki ya kati na Sserunkuma anamudu kucheza kiungo. Pia inaelezwa wakati wowote leo inaweza kumalizana na beki David Owino kisha ikamkata Joseph Owino.

Mwenyekiti wa Kamati ya Usajili ya Simba, Zacharia Hans Poppe ameliambia Mwanaspoti kuwa tayari wameshamsainisha Musheed mkataba wa miaka mitatu huku wakiwa katika hatua za mwisho kumsainisha Sserunkuma mkataba wa miaka miwili.

Hans Poppe alisema usajili wao unakamilisha idadi ya wachezaji watatu ambao wamesajiliwa kwa sasa ambao ni Musheed, Sserunkuma na Dann Sserunkuma lakini kiongozi mwingine wa Simba aliongeza wamevunja mikataba ya Amissi Tambwe na Pierre Kwizera wote raia wa Burundi na winga Uhuru Selemani.

Simba pia imesimamisha mkataba wa Raphael Kiongera kwa muda wa miezi sita ili aimarishe afya yake kwani anasumbuliwa na maumivu ya goti na ataendelea na mkataba wake wa miaka miwili ifikapo Juni mwakani.

Kwa sasa Kiongera yupo katika matibabu India na anarejea nchini Desemba 25, mwaka huu. “Tambwe na Kwizera tumeshavunja mikataba yao rasmi leo hii (jana Jumapili) na sasa wanasubiri kulipwa fidia zao za mishahara ya miezi sita kila mmoja, zoezi ambalo litakamilika kesho (leo),” alisema kiongozi huyo.

Akizungumzia uamuzi huo, Tambwe aliliambia Mwanaspoti: “Kweli nimekubaliana na Simba kuhusu kuvunja mkataba na sasa tunasubiri kulipwa fedha zetu mimi na Kwizera ili tuondoke. Nimekubali kwa shingo upande kwani unadhani tutaenda wapi?”

Akizungumzia uamuzi huo, Kocha Phiri alisema: “Tambwe na Kwizera siyo wachezaji wabaya lakini kutokana na kuja kwa changamoto mpya imebidi ufanyike uamuzi mwingine ambapo ilikuwa ni lazima wawili wakatwe ili tuwasajili hao, naamini kikosi kitakuwa imara zaidi kwenye mechi zijazo.”

Kuna uwezekano mkubwa wa Kwizera kupata timu katika nchi za Rwanda, Malaysia, Dubai na Afrika Kusini ambako imeelezwa kuna timu zimekuwa zikimhitaji.