Bale akiri hakuna wa kumfikia Ronaldo

Winga wa Real Madrid, Gareth Bale,

WINGA wa Real Madrid, Gareth Bale, amemwagia sifa mwanasoka mwenzake klabuni hapo, Cristiano Ronaldo, akikiri kwamba nyota huyo wa Ureno ndiye anayemhamasisha naye ajaribu kuwa mwanasoka mahiri duniani.

Bale ambaye alifunga bao la kwanza la Real katika ushindi wa mabao 5-1 wa juzi Jumamosi dhidi ya Rayo Vallecano, ameshajihakikishia namba katika kikosi cha kwanza cha kocha, Carlo Ancelotti.

Lakini winga huyo ambaye amepanda ndege kuelekea kwao Wales kwenye timu ya taifa ya kocha, Chris Coleman, anasema amepania kuimarisha kiwango chake ili naye aweze kushindania tuzo ya Ballon d’Or (Mwanasoka Bora wa Dunia), ambayo anaamini kwa mwaka huu Ronaldo ataitetea kutokana na kuendeleza kiwango kikubwa.

Bale amesema: “Nadhani Cristiano amefanya kazi kubwa msimu huu pia. Kwa idadi ya mabao aliyoyafunga, ametwaa Ligi ya Mabingwa akiwa nasi na soka lake ni la kuvutia. Siwaoni watu wa kumpiku, lakini nasubiri kuona nani atatuzwa na kila la heri kwa wote.”

Pamoja na fursa ya kucheza katika klabu kubwa, Bale anakiri ile hali ya kuwa katika kikosi chenye wanasoka wenye vipaji kama cha mshambuliaji huyo wa zamani wa Manchester United, ilikuwa ni sababu nyingine iliyomshawishi aondoke Tottenham mwaka 2013.

Ingawa Bale naye yumo katika orodha ya wachezaji 23 wanaowania tuzo hiyo mwaka huu, nyota huyo mwenye umri wa miaka 25 bado ana kazi kubwa ya kufanya kama anataka kulinganishwa na Ronaldo.