Kiiza: Nakuja Simba kuwanyoosha Yanga.. Soma habari kamili

STRAIKA, Hamis Kiiza, ambaye ni raia wa Uganda amefunguka kwamba atawasili Dar es Salaam wiki hii na ataichezea Simba msimu ujao wa Ligi Kuu Bara akisisitiza kuwa atacheka na nyavu kama atakavyo kwani yupo kwenye ubora wake wa juu.

Kiiza mchezaji wa zamani wa Yanga, alikiri kuwa ni kweli Mbeya City walimtaka, lakini klabu hiyo si ya hadhi yake.

Kiiza alifunguka kila kitu baada ya kuulizwa atakuwa wapi msimu ujao, ndipo akatamka anaenda Simba. “Tumeshakubaliana na Simba na nitaenda Tanzania kukamilisha baadhi ya mambo,”alisema Kiiza.

Alipoulizwa kuhusu Mbeya City, Kiiza alisema: “Ni kweli Mbeya City walinitaka, lakini kusema kweli kwa sasa bado siyo hadhi yangu. Ninachokwambia, naenda Tanzania wiki ijayo na nitacheza ligi ya Tanzania msimu ujao,” alisema alipozungumza na Mwanaspoti wikiendi.

“Kama ingekuwa hivyo, ningeamua kucheza hapa nyumbani kwa sababu zenye hadhi ya Mbeya City zipo nyingi tu.”

Katika hatua nyingine, Beki wa zamani wa Simba, Joseph Owino yuko Kenya na jana alitarajia kusaini mkataba na Sofapaka.

“Nipo Kenya kuna mambo nafuatilia kama tutakubaliana, nitasaini Sofapaka muda wowote,” alisema.