Simba kuwawinda Yanga Mwanza

KLABU ya Simba imepanga kulikimbia Jiji la Dar es Salaam na kwenda Mwanza mwishoni mwa mwezi huu ili kujiandaa na mechi inayosubiriwa kwa hamu ya Nani Mtani Jembe itakayochezwa Desemba 13.

Kwa Yanga, kocha wao Mbrazili Marcio Maximo anawasili nchini leo Ijumaa na Jumatatu ijayo nao wataanza kujifua. Timu hizo zinakwenda mafichoni zikiwa na kumbukumbu ya matokeo ya Simba kushinda mabao 3-1 katika mechi ya Nani Mtani Jembe iliyopita ambayo ndiyo ilimfungashia virago kocha wa Yanga, Mholanzi Ernest Brandts.

Kiongozi mmoja wa juu wa Simba alisema timu yao itaanza mazoezi ya kawaida Jumatatu, lakini mpango wa kambi wamekaa na kukubaliana kuwa itakuwa Mwanza na siyo Afrika Kusini kama ilivyokuwa awali, habari ambazo Wekundu hao wa Msimbazi wanazifanya kwa siri wakiwahofia wapinzani wao Yanga kuwaingilia.

Katibu mkuu wa Simba, Stephen Ally alipoulizwa alisema: “Tunatarajia kuanza mazoezi yetu Jumatatu ijayo lakini mpango wa kambi utakuwa ni hapa hapa Dar es Salaam.”