Kocha wa Azam awabadilikia wachezaji

Joseph Omog.

UKIFIKA kwenye mazoezi ya kikosi cha Azam FC, kocha wao mkuu, Mcameroon Joseph Omog amebadilika na sasa amekuwa mkali kwa wachezaji wake, akitaka kazi tu ifanyike na siyo masihara mengine kuhakikisha wanafikia malengo waliyokusudia.

Omog ambaye awali alikuwa na sifa ya upole sasa ni tofauti, ameanza na taratibu hiyo baada ya kugundua wachezaji wake wanahitaji mchakamchaka ili kukomesha matokeo mabaya ambayo anaamini yamesababishwa na nyota wake kudharau mechi na kutojituma.

Akizungumza na Mwanaspoti, Omog alisema: “Tatizo kubwa la timu yangu kupata matokeo mabaya ni wachezaji kujisahau na kudharau mechi. Ni kweli wana vipaji vya juu lakini mnapokuwa mnatafuta ushindi lazima uongeze na vitu vingine vya ziada.

“Kipaji kinakuwapo lakini bila kujituma na kucheza kwa moyo wa kutamani ushindi, ni ngumu kufanikiwa hivyo ninachohitaji sasa ni mabadiliko,kikosi changu ni bora kwa sababu kinategemewa na mataifa mbalimbali, kiufundi wako vizuri na sioni kama kuna tofauti na Vita Club ya Congo iliyocheza fainali ya Ligi ya Mabingwa wiki iliyopita ndiyo maana nataka wajitume.”

Omog amesema, katika kuboresha kikosi chake na kwenda sawa, anawaandaa wachezaji wake kiushindani katika kuwakumbusha majukumu yao kila wakati ili wachangamke pia kuwajenga kisaikolojia.