Chanzo cha ugomvi wa Ndumbaro na Malinzi hiki hapa

Mwanasheria Damas Ndumbaro

NYUMA ya moshi mkubwa unaoutazama kwa mbali, chini yake kuna moto. Si kila mmoja anaweza kuuona moto, lakini wote tunaweza kuuona moshi hata tukiwa tumesimama kilomita mbili kutoka tuliposimama.

Mwanasheria Damas Ndumbaro ambaye kwa wiki kadhaa sasa amekuwa katika mkwaruzano mkubwa na Shirikisho la Soka Tanzania (TFF), anafichua kwa kina kile ambacho kimejificha katika mgogoro wake na shirikisho hilo.

Basi la Taifa Stars, Urais TFF vyahusishwa

“Kuna mambo mengi ambayo yamejificha nyuma ya mgogoro huu, lakini nadhani chuki yangu na bwana Malinzi imechangiwa na mambo matatu,” anasema Ndumbaro kwa kujiamini katika mazungumzo aliyofanya na Mwanaspoti.

“Sababu ya kwanza ni pale lilipokamatwa basi la TFF kwa deni ambalo nadhani linazidi Shilingi 150 milioni. Malinzi alimpigia simu Silas Mwakibinga (Mkurugenzi wa Bodi ya Ligi) akimwagiza kwamba Bodi ya Ligi itoe pesa hizo kwa ajili ya kukomboa basi hilo,” anasema Ndumbaro.

“Mimi niligoma kwa sababu ni mmoja kati ya watu waliokuwa wanatia saini katika utokaji wa pesa hizo. Pesa ambazo zilikuwepo pale ni za Yanga. Unajua mpaka leo Yanga hawajafika kuchukua pesa zao ambazo zipo katika udhamini wa Azam TV na sisi bado tumewawekea. Nikamuuliza Mwakibinga, hawa Yanga kuna mtu mmoja tu anaweka ngumu pale, lakini vipi kama akiondoka ghafla leo? Kesho asubuhi tu watakuja kuzichukua. Nikagoma.” “Mwakibinga alimwambia Malinzi aongee na mimi lakini akagoma, akasema ‘Mimi siwezi kuongea na Ndumbaro.”

Ndumbaro anadai kwamba sababu ya pili ilikuwa ni pale alipokataa wakaguzi waliochaguliwa na Malinzi wasiikague Bodi ya Ligi.

“Nadhani wakati anaanza kututafuta sisi watu wa Bodi ya Ligi akiamini kuwa labda tuna pesa nyingi sana akatuma wakaguzi wake waje kutukagua. Aliituma kampuni ya Price Waterhouse Coopers. Wakaja jamaa fulani pale wawili ni Wahaya, nikajua dhumuni lao lilikuwa nini,” anasema Ndumbaro.

“Lakini kwa mujibu wa Katiba ya TFF, wakaguzi wa TFF pekee ndio wanaoruhusiwa kutukagua sisi Bodi wa Ligi. Hapo Malinzi alikuwa anakaribia kuvunja katiba. Nikaona bora nimuokoe kwa kugomea wale wakaguzi wake. Alipouliza kutoka kwa wapambe wake akaambiwa Ndumbaro ndiye amezuia. Akaweka kinyongo.”

Baada ya sababu hizo mbili, Ndumbaro anaamini kuwa sababu ya tatu kubwa zaidi ambayo ni ya msingi ni jinsi ambavyo Malinzi amedanganywa na wapambe wake kuwa nautaka urais katika uchaguzi ujao.

“Wapambe wa Malinzi wamemdanganya kuwa Friend’s of Simba wanamuandaa Ndumbaro kuwa rais mpya wa TFF mara Malinzi atakapomaliza kipindi chake cha kwanza kitu ambacho siyo kweli. Napenda nikutamkie, mimi sina ndoto hizo. sina mpango huo kabisa na Malinzi aelewe hivyo. Kifungo chake cha miaka saba kimelenga kuhakikisha kuwa anamaliza vipindi vyake vyote viwili kwa amani kabisa,” anasema Ndumbaro.

“Baada ya hayo mambo yake mawili hapo juu kukwama ndio akataka kuvunja Bodi ya Ligi. Kumbe katiba ilikuwa inambana. Ndio maana mpaka leo unasikia kimya.”