Twite aamua kujipeleka Simba bure

PACHA wa Mnyarwanda wa Yanga, Mbuyu Twite anayeitwa Kabange Twite yupo jijini Dar es Salaam na akawaita Simba mezani wakubaliane aichezee klabu yao akisisitiza yeye hataki pesa, bali anataka kucheza.

Kabange mchezaji wa zamani wa APR, FC Lupopo na timu ya Taifa ya Rwanda ‘Amavubi’, amesema amemaliza mkataba wake na FC Lupopo na anaona ni wakati wa kucheza Ligi ya Tanzania na amevutiwa kutokana na mafanikio waliyopata wachezaji wenzake aliocheza nao pamoja.

Akizungumza na Mwanaspoti, Kabange alisema: “Nimekuja Tanzania kwa mapumziko, lakini lengo langu ni kutafuta timu, nataka nicheze Tanzania. Nimeona namna wachezaji wenzangu kama Mbuyu, Niyonzima (Haruna) tuliokuwa tunacheza nao wanavyofanikiwa na mpira wa hapa.

“Niko tayari kucheza timu yoyote na nimesikia Simba hawajakamilisha usajili wao, waje tu tuzungumze, ninachotaka ni kucheza tu, masuala ya pesa yatakuja baadaye.”

Kabange anacheza zaidi nafasi ya kiungo na anaamini hatakuwa na shida ya kuendana na mambo ya Bongo.